धुवाकोटमा गोरुजुधाई महोत्सव तथा सोनाम ल्होसार विशेष सांस्कृतिक कार्यक्रम आयोजना हुँदै
धादिङ ३० पौष
भङ्गेरी युवाक्लबद्वारा धुवाकोटमा गोरुजुधाई महोत्सव तथा सोनाम ल्होसार विशेष सांस्कृतिक कार्यक्रम आयोजना हुने भएको छ ।
क्लबले माघेसङ्क्रान्तिको अवसर पारेर नीलकण्ठ नगरपालिका–१४ स्थित धुवाकोट भँगेरीस्थानमा गोरुजुधाई महोत्सव तथा तामाङ समुदायको महान् सांस्कृतिक राष्ट्रिय पर्व सोनाम ल्होसारको अवसरमा वृहत् सांस्कृतिक कार्यक्रम आयोजना गर्ने तयारी तीव्र पारेको हो ।
नीलकण्ठ नगरपालिकाको संरक्षकत्व तथा भङ्गेरी युवाक्लबको आयोजनामा हुने उक्त कार्यक्रम सोनाम ल्होसार मञ्जुश्री सम्वत् २८६२ औँ ता–ल्हो (घोडा वर्ग) को अवसरमा शुभकामना आदान–प्रदानसहित सम्पन्न गरिनेछ । कार्यक्रममा ख्यातिप्राप्त कलाकार तथा स्थानीय कलाकारहरूको बेजोड सांगीतिक प्रस्तुति र नृत्य प्रस्तुत गरिने आयोजकले जनाएको छ ।
क्लबका अध्यक्ष विशाल तामाङका अनुसार धुवाकोटमा परम्परागत रूपमा हुँदै आएको गोरुजुधाई महोत्सवमार्फत कृषक प्रोत्साहन, कृषि संस्कृति संरक्षण, मनोरञ्जन प्रदान गर्दै आन्तरिक पर्यटन प्रवद्र्धन गर्ने उद्देश्यले कार्यक्रम आयोजना गर्न लागिएको हो । यसैगरी, क्लबकी उपाध्यक्ष कमला तामाङले तामाङ समुदायको पहिचान, मेलमिलाप, संस्कृति तथा रीतिरिवाजको संरक्षणसँगै समुदायको हित र क्लबको विकासका लागि आर्थिक संकलन गरी कोष स्थापना गर्ने लक्ष्य रहेको जानकारी दिनुभयो ।
आयोजकका अनुसार कार्यक्रममार्फत करिब १० लाख रुपैयाँ आर्थिक संकलन गर्ने लक्ष्य राखिएको छ । कार्यक्रममा ख्यातिप्राप्त कलाकार सलिना तामाङ, सैल्प वाइवा, बिनिता गुरुङलगायत स्थानीय कलाकारहरूको आकर्षक प्रस्तुति रहनेछ । कार्यक्रमको मिडिया पार्टनर रेडियो विहानी ९७.६ मेगाहर्ज रहने आयोजकले जनाएको छ ।