त्रिपुरासुन्दरी माइ मेला : आखुखोलामा धुले–बासको पुल निर्माण सम्पन्न, स्थायी पुलका लागि माग तीव्र
धादिङ — धादिङ जिल्लाको उत्तरी क्षेत्रमा रहेको त्रिपुरासुन्दरी माइको मेला अवलोकन गर्न वर्षेनि हजारौँ भक्तजनहरू आउने गरे पनि आखुखोला तर्ने व्यवस्था चुनौतीपूर्ण हुने गरेको छ। परापूर्वकालदेखि प्रत्येक वर्ष मेलाको अघिल्लो सातादेखि सुरु हुने धुले–बासको अस्थायी पुल निर्माण परम्परा यस वर्ष पनि सफलतापूर्वक पूरा गरिएको छ।
आखुखोलामा बग्ने तिव्र धारका कारण स्थानीयवासी, भक्तजन तथा यात्रुहरूका लागि सुरक्षित आवागमन सुनिश्चित गर्न बनाइने यो बास–धुले पुल अहिले मेला व्यवस्थापनको महत्वपूर्ण हिस्सा बनेको छ। स्थानीयहरूका अनुसार पुल निर्माणका कारण यस वर्ष मेलामा आउने भक्तजनलाई यात्रा अधिक सजिलो हुने अपेक्षा गरिएको छ।
वडाध्यक्ष सिटौलाद्वारा ट्र्याक्टर सहयोग
पुल निर्माणका लागि आवश्यक सामग्री तथा रसद ढुवानीमा यस वर्ष त्रिपुरासुन्दरी गाउँपालिका–५ का वडा अध्यक्ष राजेन्द्र सिटौलाले ट्र्याक्टर सहयोग उपलब्ध गराए। स्थानीयवासी र आयोजनामा संलग्न समितिले अध्यक्ष सिटौलाप्रति विशेष आभार व्यक्त गरेका छन्।
समितिका सदस्यहरूका अनुसार, ट्र्याक्टर सहायता नहुँदो हो भने पुल सामग्री ढुवानीमा निकै कठिनाइ हुने थियो।
दुई दिनको निरन्तर श्रमदान
धादिङ जिल्लाको प्रमुख सांस्कृतिक तथा धार्मिक पर्व माइस्थान पूजा र न्वागी को अवसरमा ज्यामरुङ र सल्यानबेसी क्षेत्रका स्थानीयहरू सहित भक्तजनहरूले हिजो र आज दुई दिनसम्म निरन्तर श्रमदान गरेर पुल निर्माण कार्य पूरा गरेका हुन्। पुल निर्माणमा युवा स्वयंसेवक, स्थानीय बृद्ध–बृद्धा, विभिन्न टोल विकास समितिका सदस्यहरूको सक्रियता उल्लेखनीय रह्यो।
स्थानीयवासीका अनुसार, ‘‘मेला र पर्वका बेला आखुखोलाले बाटो बन्द गरिदिँदा गाउँ–गाउँ जोड्ने सम्पर्क टुट्ने भएकाले हरेक वर्ष सामूहिक श्रमदान अत्यावश्यक हुने’’ बताइएको छ।
माइस्थानमा भीड बढ्ने अपेक्षा
त्रिपुरासुन्दरी माइको दर्शनका लागि धादिङ मात्र नभई छिमेकी जिल्ला र काठमाडौं उपत्यकाबाट समेत भक्तजन आउने गरेका छन्। पुल निर्माण सकिएसँगै यस वर्ष मेलामा थप भीडभाड बढ्ने अपेक्षा गरिएको छ।
स्थानीय समिति, सुरक्षा निकाय र स्वयंसेवकहरू टोलीगत रूपमा मेलाको सुरक्षा, यात्रु व्यवस्थापन तथा पहुँच सहज बनाउने तयारीमा जुटिरहेका छन्।
